तालुक्यातील शेतकऱ्यांचे हिरवे स्वप्न मुसळधार पावसाने गेले वाहून

उमरखेड / हिमायतनगर नागोराव शिंदे  :- 

ढगफुटी सदृश्य जोरदार पावसामुळे कोपरा बु., चातारी, बोरी, सह तालुक्यातील शेतातील पिके प्रचंड प्रमाणात खरडून गेल्यामुळे उसनवारी बँक कर्ज पदरमोड करून शेतात पीक पेरणी केली व प्रत्येक शेतकरी शेतातील पिकांची हिरवी स्वप्ने बघू लागला अशातच काल रात्रीच्या पावसासोबत ती स्वप्ने वाहून गेली. 

राष्ट्राच्या अर्थव्यवस्थेचा कणा जगाचा पोशिंदा शेतकरी राजा ने अगोदरच हवालदिल असलेल्या परिस्थितीतही आपल्या शेतात पेरणी केलेल्या पिकाचे नुकसान बघून त्यांचे डोळे स्वप्नहीन झालेले चित्र आज बघावयास मिळत आहे. 

झालेल्या मुसळधार पावसामुळे तालुक्यातील कोपरा बुद्रुक, चातारी, बोरी तर मराठवाड्याच्या हिमायतनगर तालुका येथील शेतातील ऊस कापूस सोयाबीन हळद इत्यादी पिके पूर्णतः खरडून गेली आहे

या भागातील पाहणी करण्याकरता उमरखेडचे कर्तव्यदक्ष तहसीलदार आनंद देऊळगावकर तसेच तालुका कृषी अधिकारी यांनी या गावातील शेतात प्रत्यक्ष जाऊन पाहणी करून प्रत्येक शेतातील पीक नुकसानीचे पंचनामे करण्यात येईल व शासनातर्फे नुकसानग्रस्त शेतकऱ्यांना मदतही मिळेल तरी शेतकऱ्यांनी घाबरू नये, तसेच अतिवृष्टीचा इशारा असल्यामुळे तालुक्यातील कोणत्याही नागरिकाने पाऊस सुरू असताना घराबाहेर पडू नयेत 

पूरसदृश्य स्थिती निर्माण झाल्यास कोणत्याही  पुलावरील नाल्यावरील पुराचे   पाणी कमी झाल्याशिवाय  ओलांडू नये, घरामध्ये पाणी शिरत असताना सुरक्षित स्थळी सहकुटुंब स्थलांतरित व्हावे असे आवाहन तहसीलदार आनंद देऊळगावकर यांनी केले. 

यावेळी कोपरा बुद्रुक येथील रितेश पाटील कदम , उमरखेड चे सभापती कृष्णा पाटील देवसरकर,  पोलीस पाटील सुनिल देवसरकर राजु पाटील , अशोकराव वानखेडे , दादाराव वानखेडे , धनंजय माने ,यांचे सह शेतकऱ्यांनी झालेल्या पिकाच्या नुकसानीची मदत मिळावी असे निवेदन तहसीलदार यांना दिले .